移居日本｜移居沖繩 實際經驗 第二篇 ～ 車

呢度新車，可以供6個月至10年不等！比少少首期，一架660cc 汽車，10年月供大約一万円

（唔好意思，唔想拖，所以今次篇幅比上次長）

2016年三月，當時匯率是100円：6.6HKD

伸延閱讀2019 日本移居攻略 – 上篇, 在留資格簽證: https://www.oki-family.com/2019migration01/

到左沖繩之後，第一件事就係去攞車。我地之前在ABC Rent-a-car 訂左架車一個月，大約4万円，攞車嘅時候，佢地問我需唔需要預訂多一個月，但預訂咗就要俾錢。我地問價錢會唔會有分別，佢話應該唔會。 橫掂我地都諗住買車，雖然未知幾時買，都冇一次過訂2個月。

我地就開始左一個周圍搵新車嘅節目。

各位知道沖繩冇車係會跛咗：睇佢地嘅巴士，有別於日本其他地方—係非常之唔准時（本島人稱之為Okinawa Time）！

呢度新車，可以供6個月至10年不等！比少少首期，一架660cc 汽車，10年月供大約一万円（我想知道架車如果捱唔到10年點算？有機會我會講，在日本買車同香港唔同嘅地方。），絕對負擔得起。咁外地人呢？喺你未能夠攞到居留簽證之前，係冇人會賣車俾你！冇錯，因為保險問題！你冇在留卡（即居留卡），買保險嘅時候，你冇辦法提供足夠資料！所以我地當時買．唔．到．車…… (//∇//)

咁樣，唯有續租架車。但我地要續租嘅時候，佢同我地講，promotion 完左，架車要比多一陪價錢！冇辦法啦唯有續租。當我地續租前一兩日，打去confirm，佢突然間同我地講，唔可以月租俾我地，因為旺季。我地當堂彈起左！點算點算，其他租車公司仲貴！

突然間醒起，有個朋友可以介紹租車（但唔會租俾遊客），我地馬上聯絡嗰個朋友，去到嗰個租車地點。我地見到嗰個租車店店長之後，老實同佢講話我地其實想買車。佢非常之好人同老實，因為朋友介紹，佢唔單止肯租車俾我哋，重肯賣車俾我地！佢更加幫我地解決保險問題！（我唔方便喺呢度開名，為佢哋唔做遊客生意，亦都唔想為佢地帶來不必要嘅煩惱，sorry。） 二話不說，我地同佢係3個禮拜內買咗兩架車。加埋都只不過係100万円。

唔講你唔知，所有與車有關嘅費用，原來係根據車嘅馬力決定。660cc 最多人要，因為乜嘢都係最平。高速公路路費亦都平啲！連俾人抄牌！都係跟住你嘅馬力定罰款金額！有一次違例泊車，我老婆架車俾人抄牌，¥18000. 而我架660cc車仔，就平好多，¥12000。好彩抄牌嘅時候，我地唔喺車裏邊。否則會俾人扣分。無錯！違例泊車都會俾人扣分！

咁住嘅問題我地點樣解決？
我地將我地嘅情況話咗俾老闆聽，佢聽完之後都好氣憤我地喺Airbnb 比人甩底。佢叫我地自己去搵屋，佢會用公司名義幫我地租。但是當然，需要業主同意，給公司做員工宿舍。經過左幾日不眠不休上網狂搵屋、喺Google Map Streetview 睇清楚屋附近情況，千揀萬揀，揀左3～4間，跟住就係艱苦等待。搵經紀、等經紀同業主傾、中途殺出個定休日又曬左時間！最終確認第二選擇的盤仲喺度，然後業主終於同意。如是者，我地用左最簡單方法解決左成件事！咁我地就好開心咁取消我地嘅酒店預約（Jalan.net)，幾日之後攞鎖匙搬入新屋！

日本嘅樓價同租盤定價與香港其實非常相似，其中一個主要因素，係校網。我地居住的區域，大約等於香港九龍塘。屬於中上價。幾多錢？8萬多一個月， 550尺 。呢個價錢唔好話香港，大阪福岡都未必可以。

依家有車，有地方住，放下好多心頭大石。但係我地面對嘅問題，遠遠未見盡頭！

有咗屋有咗地址證明，但冇諗過收信會出現問題。原來日本有規例，如果寄信去某一個地址，收件人沒有註冊住在那地址，郵局可能會打回頭！！我臨離開香港之前，寄咗一箱野去朋友屋企（飯煲啦，火牛啦，LCD mon 啦，電腦音響啦….慳得就慳嘛） 好彩寫埋朋友個名，如果唔係就大鑊！大佬，日本飯煲好貴仲要煮飯好慢！所以搬咗入去之後，快手手去郵局註冊！

好啦一間屋乜嘢都齊晒，係時候認真幫阿囡搵學校。 下次我地就會講，幫阿囡搵學校面對嘅問題。係時候將枝咪，比媽媽！

P.S. 嗰陣時我地未有居留簽證，有一次，下晝突然間有人㩒鐘。死啦係咪移民局來捉，應該冇人會探我地！連郵局都未註冊，唔會派信！無辦法，都要開門。一開門，原來係NHK 特派員，來 收．錢！因為買咗新電視，每張電視會跟一電視卡。睇電視係要比錢！咁咪唯有俾錢囉….. 唔知佢地係咪知道呢一個係厭惡性行業，佢地搵左一個態度非常之好嘅伯伯上嚟。令到你唔俾唔得。

伸延閱讀《移居沖繩 實際經驗 第一篇》:https://www.oki-family.com/migration01-newhome/

伸延閱讀 2020 日本（沖繩）買樓攻略： 看房子及注意事項: https://www.oki-family.com/日本買樓第一篇注意事項/

移居沖繩影片｜我們第五年的感受

伸延閱讀 :2020 沖繩移居指南  (不定期更新)