日本掉垃圾 Part 2: XYZ&^%$#!

0
31

之前舉行過日本掉垃圾網上進修課程,身為「講師」的我們,以為見慣大場面,今日,先至知道乜嘢叫做大蛇屙尿! #%^@¥$€!

今個星期將會有一個巨型超強大颱風吹襲沖繩,路徑同2018年嗰個好相似, 東邊過嚟, 到咗沖繩南部一個屈尾拾向北走, 颱風隨時逗留沖繩度假兩三日,破壞力會幾何級上升,當年導致大停電。

但係呢個唔係重點,住沖繩就預咗有颱風。颱風亦都對海洋有益… (下刪千字)

因為颱風所以令到爸爸的起心肝清理花園雜物同埋車尾箱。上年普通颱風吹咗媽媽架三輪單車去花園另一邊 。(系,車尾箱係爸爸嘅迷你倉,所以我哋個家庭車越買越大)

因為我哋有一個篋神需要處理,日本呢啲叫做「大件垃圾」,需要叫業者回收。承惠¥300。

住喺香港嘅你哋好快都要比!睇你哋笑得幾耐!你哋仲有啲禮義廉垃圾冇得掉!

我哋個認知手續就係,10公斤以下,屬於「小型大件垃圾」,去便利店買一張¥300 垃圾貼紙,貼有嚿垃圾上邊,回收日拎出門口就搞掂。

咁梗係首先要打電話去約嗰個業者先。

「Mushi mushi~你想我點幫你!」業者通常比較粗豪。

日文當然難唔到媽媽。但對話途中已經目露凶光,收線嘅時候孖叉不停!

「頂佢x!佢問我垃圾裏面有啲乜嘢,有幾重。我鬼叉知呀!我掉張梳化需要斬件磅重呀?!勉強同佢講完有啲乜嘢之後,佢話每一件垃圾裏面只可以有六件物件,超過左就要第二日再嚟回收!」媽媽咆哮

「第二日?」爸爸小心翼翼回答

「係呀!佢哋話呢啲細「小型大件垃圾」每日每一戶只可以回收一件,第二件「小型大件垃圾」,要第二日再嚟回收,你買多張貼紙都唔得!」媽媽繼續咆哮

「嚇?」俾錢都唔得?

「黐L線! 咁佢自己浪費油錢!第二日咪要再嚟過!邊x整啲咁嘅規矩!」媽媽仍然繼續咆哮。

最後,直接我哋拎去附近垃圾站搞掂。仲要平啲。

嘥時間去便利店買貼紙, 嘥時間打電話, 浪費心力,不如直接拎去回收站。

黐L線!

居住在日本6年,經歷了一些不一樣的體會。大家可以購買我們的書【日本生活原來如此!?】:https://books.mingpao.com/product/日本生活原來如此?!-在地香港人的潛文化體/

LEAVE A REPLY

Please enter your comment!
Please enter your name here